‘t Vasteloavendkonzeërt van de Phil is d’r alwerm!
V’r junt werm rui-ig óp de Vasteloavend aa. Nou ja, d’r inge jet rui-iger wie d’r angere... Mer dat betseechent dat óch de Bóchezer Phil ziech werm ópmaat vuur ‘t joarliche Vasteloavendskonzeërt!
D’r nuie Piet
Van d’r Völzer Piet hant v’r vörrig joar afsjied mótte numme, e trók ‘t leider nimmië, mer vanaaf dit joar keunt d’r Roger Lataster d’r janse boel aan-ee moele! Fleich kent d’r ‘m nog va duo Sjwats / Wies? E nui decennium mit inge nuie sjpraechsjtalmeester, inge frisje wink mit nui wietse, dat beloaft toch jet, wa luuj? Mit d’r Roger va Kirchroa (v’r hotte de traditie jeweun in ieëre) jeet ‘t inge bónte kroam weëde! Want ay caramba, ‘t weët ¡ Fiesta Mexicana !
¡ Fiesta Mexicana !
D’r aansjtoande zóndig d’r zessingde (16de) Fibberwaar zut d’r va hatse i-jelane um mit ós tse viere! ‘t Weët bailar en cantar, of óp ze Bóchezer: sjoenkele e mitkrakeële! D’r zaal kluuert ‘t roeë, wies, jrung van de Mexicaner vaan - of angesj jeël i plaatsj va wies, vuur de Vastelovvend. V’r krient e optreëne van de Herringbiessere! De buut weët verzörgd durch d’r Ger Frenken (of d’r Jer, wènt d’r jeweun va Bóches zut). En dat allenui ónger de jrandioeës leiding van el presidente, Loek Smeijsters!
Adieë, Prins Loïc
Mer óch sjtunt v’r sjtil bij ing dreuf verplichting. D’r zessingde Fibberwaar is ‘t immers óch d’r daag dat ózze Prins, d’r Loïc d’r Lètste, zieng kroeën en zienge scepter mót i-livvere. Zal d’r dirigent ’t druuech hotte? En zou d’r noe überhaupt nog ing veer aan die kroeën zitse? V’r junt ‘t zieë. En óch weë d’r nui Prins, of zoejaar de nui Prinses van de Phil weët!
Alles wat d’r mót wese
Dus komt allenui noa d’r Harmeneitszaal, d’r zessingde (16de) Fibberwaar, woa v’r um 13.11 oer mit ós ¡ Fiesta Mexicana ! aavange! Dresscode: sombrero’s en inge krulsjnauts. Vuur nacho’s en tequila weët jezörgd! ¡Arriva! ¡Arriva!. Hasta la vista, luuj!
Carnavalsconcert
Zondag 16 februari 2020 - 13.11 uur
Harmoniezaal Bocholtz
